Author: Sigurlaug

17. apríl 2017
Í allan morgun hef ég setið við að lúslesa textann á síðunum og laga málfar og innsláttarvillur. Einnig hef ég minnkað margar myndir og passað uppá að það lofti vel í kringum þær.

Setti myndagallerý á svæðið fyrir neðan flekana fjóra. Bjó fyrst til borða og hann var ekki snjalltækja vænn, þannig að nú er komið þar myndagallerý. Röð myndanna stokkast upp við endurræsingu á síðunni. 

Búin að vera törn um páskana og á morgun set ég síðuna í salt og huga að verkefni í fræðilega hlutanum. Það á að fjalla um síðuna mína sem miðil. Mun tengja það verkefni við þessa síðu svo það er eins gott að vanda sig.

16. apríl 2017.
Í dag bættust við síður Um sigurlaug.is, Fjölskylda, Bali, Áhugamál, Menntun og Störf sem falla í flokkinn Höfundur. Ég hlóð inn Accordion plugin og setti efni á þrjár af þessum síðum inn í harmonikur sem það plugin gerir svo flott. Efnið á hinum þremur síðunum passaði ekki í harmonikuna, t.d. tókst mér ekki að láta myndagallerý birtast rétt þar.

Áttaði mig ekki alveg strax á því hvernig unnið er með þessar harmonikur og hringdi í vin, Díönu Sigurðardóttur sem kenndi mér þetta á örfáum mínútum. Takk Díana, gott að hafa svona reyndan kennara á línunni þegar mikið liggur við.

Síðurnar eru núna alls 64 og verður ekki fleiri síðum bætt við að þessu sinni. Næsta mál á dagskrá er að lús-lesa allt efni yfir og lagfæra málfar og innsláttarvillur.

Í lokin ætla ég að búa til myndagallerý sem mun fara á forsíðuna. Það gallerý ætla ég svo að nýta í síðasta hreyfimynda verkefnið.

Kötturinn Lommi fylgist með vefsíðugerðinni af miklum áhuga og auðvitað bættust myndir af honum í myndadagbókina. Hér er mynd af Lommanum með íbygginn svip.

15. apríl 2017
Ein mynd bættist í myndadagbókina í dag. Hana tók ég með símanum mínum, því myndavélin gleymdist heima. Myndin er tekin í Stykkishólmi af krúttlega vitanum þar….en hann er í réttum litum.

Er ekki alveg viss um hvar á heimasíðunni ég mun setja myndadagbókina til frambúðar. Síðdegis ákvað ég að setja Dagbók sem val á aðalborðann og svo Dagbók í myndum undir þá síðu.